Lorna Tolentino itinanggi ‘relasyon’ kay Lito Lapid



Nakakaaliw na chikahin si Lorna Tolentino lalo na kapag tungkol sa love life ang topic.
Siyempre, panay ang ungot namin sa kanya tungkol sa tsismis sa kanila ni Sen. Lito Lapid, na nabuo nga ang love team nilang PriManda (Primo at Amanda) sa ‘Batang Quiapo’.
Biro nga namin kay Lorna, napakaganda ng 2024 sa kanya, na ang ganda ng career niya sa telebisyon, at may pelikula pa siya sa Metro Manila Film Festival, ang ‘Espantaho’ na dinirek ni Chito Rono, at heto nga, may love life pa siya.
“Maka-segue ka naman sa love life. Hahaha!
“Okey na po ako. Maligaya po ako!” sabi niya.
Maligaya ang puso niya?
“Happy po ako sa lahat ng bagay! Happy sa blessing. Happy sa graces na binibigay ni Lord.
“Tapos may dalawang offer pa agad for 2025. Suwerte talaga,” sabi niya.
Pero, ano ba ang sikreto niya at nananatili siyang fresh, mukhang bata, sariwa?
“Maraming salamat sa BeauteDerm, sa lahat ng mga sponsors!” sabi niya.
Pero siyempre, iba pa rin ang nagagawa kapag in love ka, mas bumabata nga raw?
“Ahhhh, ang inuuna ko kasi ay `yung mamahalin ang sarili mo. Kasi kapag mahal mo ang sarili mo, lahat ng magagandang bagay, `yun ang gusto mo. ‘Yun ang importante!” sagot ni Lorna.
Pero, ano ang pakiramdam na may nagmamahal pa rin talaga sa iyo?
“Marami po ang nagmamahal sa akin!” sagot niya.
Oh sige, may nagpapakilig sa iyo?
“Naku, iba ka talaga! Marami po sila. Hahahaha!” sey niya.
Nagpapaligaw pa ba siya?
“Hindi! Hindi! Hindi!”
O baka naman hindi ka na puwedeng magpaligaw, dahil taken ka na?
“Hindi po! Hindi talaga!” tawang-tawa na sagot ni Lorna.
Friends lang kayo ni Sen. Lito Lapid?
“Naku, ang dami kong friends na Senador. Ang dami nila. Ang dami ngang nagmamahal sa akin. Ang daming naging kaibigan ni Daboy (Rudy Fernandez), na up to now, na-extend sa amin,” sey niya.
So, dahil matatapos na raw ang ‘Batang Quiapo’ kaya matatapos na rin ang PriManda?
“Yes, matatapos na ang love team!” sabi niya.
Ay, wala nang off cam friendship?
“Siyempre meron pa rin. Okey lang. Pero ang love team, wala na!” chika niya.
So, tuloy pa rin ang pagdi-date nila kahit tapos ang love team?
“Anong date? Walang ganun! Hahahaha!” natatawang pahayag ni Lorna.
Anyway, kaaliw rin ang chika ni Lorna habang ginagawa ang ‘Espantaho’ dahil may mga moment daw na natutulala siya sa mga mahuhusay niyang kaeksena, tulad nina Judy Ann Santos, Chanda Romero, at marami pang iba.
“Hindi kasi ako masalita. Parang ina-absorb ko lang sila. Minsan parang natutulala ako sa rehearsal. Nakakalimutan ko na ako na pala. Kasi minsan one line lang, eh.
“Kasi parang nanonood ako sa teatro, para akong nanonood ng isang buong pelikula sa loob. Pero pag take naman, kailangan siyempre, ready, dahil kung hindi may magagalit.
“Baka may magsabi sa akin na, ‘uy, uy, ano ginagawa mo, bakit ka nakatulala?’ Hahaha!” sabi na lang ni Lorna.
Siya nga pala, kasama rin sa ‘Espantaho’ sina Janice de Belen, Eugene Domingo, Tommy Abuel, Nico Manalo, Mon Confiado at JC Santos.
Bongga! (Dondon Sermino)