Janine Gutierrez on working with Lauren Young: ‘Game!’
Dahil pareho silang naging ex-girlfriend ni Elmo Magalona, hindi maiwasan na may magtanong kung nagkaroon kaya ng ilangan sa dalawang Kapuso actress ngayong magkasama sila sa bagong afternoon drama series na “Legally Blind.”
Sa ulat ni Rommel Gonzales sa PEP nitong Martes, nilinaw nina Janine at Lauren na walang naging problema sa working relationship nila kahit pa dati silang na-involved sa iisang lalaki.
Paliwanag ni Lauren, wala namang kailangang linawin sa kanilang dalawa ni Janine kaya naging maayos na raw kaagad sila sa sa familiarity workshop pa lang daw ng serye.
Kuwento naman ni Janine, nabanggit niya sa pag-uusap nila ni Lauren na sincere siya na excited siyang makatrabaho ang aktres.
Inihayag din ni Janine ang labis na paghanga niya kay Lauren bilang isang mahusay na aktres.
“Sa totoo lang, alam ko talaga na magaling na magaling na artista si Lauren kasi napapanood ko siya dati,” saad ni Janine patungkol sa dating seryeng Hiram Na Alaala kung saan nakasama ni Lauren ang ina niyang si Lotlot de Leon.
“Alam ko na magaling talaga si Lauren dati pa, so nung sinabi sa akin na magkaka-work kami, ‘Game!,’”kwento pa ni Janine.
At ngayong magkatrabaho na sa “Legally Blind” kung saan gumaganap sila bilang magkapatid, sinabi ni Janine na magkasundo sila ni Lauren dahil marami silang mga kinahihiligan na magkapareho.
“We get along, and I’m glad na we’re working together kasi ‘pag kailangan ko medyo ng mas hugot or tulong, ‘pag kinakausap ko si Lauren, nakakatulong talaga,” aniya.
