Dahil sa tagumpay na tinatamasa ngayon ng tambalang Kathryn Bernardo at Alden Richards, dumami ang mga nagre-request na bigyan na sila ng teleserye. Matapos ang tagumpay ng kanilang pelikula “Hello, Love, Again,” na patuloy na kumikita ng milyon-milyon mula sa Star Cinema, ABS-CBN Studios, at GMA Pictures, maraming fans ang naniniwala na ito na ang tamang panahon upang pagsamahin ang dalawang superstar ng kanilang henerasyon sa isang teleserye.
Kung magpapatuloy ang tagumpay sa takilya ng pelikulang ito, tiyak na maibabalik nila ang titulong “Box-office King & Queen” mula kay Marian Rivera at Dingdong Dantes, na nagtaglay ng titulong ito sa pelikulang “Rewind.” Ang kasalukuyang tagumpay ng “Hello, Love, Again” ay nagbigay pag-asa sa mga tagahanga na makita silang magsama muli sa isang proyekto sa telebisyon, kung saan magiging mas malawak ang kanilang exposure at mas marami pang tao ang makakapanood sa kanilang tambalan.
Sa mga pahayag ng parehong Alden at Kathryn, pareho silang bukas sa ideya ng pagsasama sa isang acting project, ngunit may mga konsiderasyon pa rin sila. Ayon kay Alden, handa silang magsama sa isang teleserye basta’t may magandang kwento at bagong bagay na ipapakita sa kanilang mga tagahanga. “Once siguro na may magandang story, something new, something different to show the people,” ani Alden. Samantalang sinabi naman ni Kathryn, “Basta may magandang materyal, why not?”
Subalit, bagamat pareho nilang ipinapakita ang kanilang kagustuhan na magsama sa isang proyekto, inamin nila na ang desisyon ay nakasalalay sa kanilang mga management dahil magkaiba sila ng network. Ngunit, sa kabila ng pagkakaiba sa network, sinabi ni Kathryn na dahil wala nang “network war” ngayon, posible na nilang matulungan ang bawat isa sa pagbuo ng isang teleserye. “Bago naman nila i-pitch ‘yon, maraming discussion ‘yun. So, kapag naka-decide na, both networks, and ipi-pitch sa amin, we’re just very open naman with it,” pahayag ni Kathryn.
Kaya naman, ang mga fans ni Alden at Kathryn ay patuloy na umaasa at naniniwala na balang araw ay magkakaroon sila ng isang teleserye na tiyak na magiging hit sa telebisyon, tulad ng kanilang naging tagumpay sa pelikula. Ang kanilang tambalan ay patuloy na minamahal ng mga manonood, at malaki ang posibilidad na magtagumpay din sila sa maliit na screen.
