Nagkaroon na ng world premiere ang pelikulang Lilim sa 54^th International Film Festival Rotterdam nitong Enero.

Dinaluhan ito ng lead star na si Heaven Peralejo at direktor ng pelikula na si Mikhail Red.

Lahad ni Heaven, “Grabe, nakakatuwa yung experience!

“First, alam mo yung kaba nandoon, na, ‘Ano kaya ang gagawin ng mga audiences once na mapanood nila yung film?’

“Pero nakakatuwa kasi nagustuhan ng mga foreign audiences, nandun din yung mga kababayan natin na sinuportahan talaga yung film.

“Buti na lang nandun din si Direk para gabayan ako, kumbaga, doon sa festival.

“And siyempre, hindi ko mapupuntahan yung festival na iyon kung hindi rin naman sa Viva, so thankful naman ako.”

HEAVEN PERALEJO GHOST EXPERIENCE

Dahil isang horror film ang Lilim, pinagkuwento si Heaven ng karanasan niya sa tunay na buhay na nakakatakot.

Mayroon nga.

Naganap raw ito noong nakatira si Heaven sa isang condominium unit.

Aniya, “Every night, every night guys, as in hindi ako nagdyu-joke, every night, binabangungot ako.

“Yung bangungot as in yung tipong sumisigaw ako pag gumising ako kasi hindi ko kayang gumising mag-isa.

“Like, alam mo yung hirap na hirap kang gumising? Yung ginagalaw mo yung katawan mo, pero ayaw?

“So, parang pag nagising ka, ‘Aaaahhh!’ Like, ganun talaga. Tapos sabi ko,’ Bakit kaya?’

“Hindi ko naman din alam kung bakit, pero naiinis na ako kasi hindi ako makatulog na mag-isa.”

Pinapunta raw ni Heaven ang lola niya na “nakakakita” ng espiritu sa tirahan niya.

“So iyon pala, all along, nandun lang pala sa may… ‘Heaven, may nakatayo dito,’ sabi ng lola ko. ‘Ha, Talaga ba?’

“Sa corner pala nung kuwarto ko na kung saan ako naka-face, may lalaki daw na nakatingin lang. So ako, ‘Ha?!’

“So, after nung nalaman ko, tumaas talaga yung balahibo ko!”

HEAVEN PERALEJO MOVIE

Samantala, kasama ni Heaven sa Lilim sina Eula Valdes, Ryza Cenon, Mon Confiado, Skywalker David, Rafa Siguion-Reyna, Nicole Omillo, at Phoebe Walker,

Ipapalabas sa mga sinehan ang Lilim simula sa Miyerkules, March 12, mula sa Viva Films.