Sinagot ng comedian-vlogger and showbiz insider na si Ogie Diaz ang tanong ng mga fans kung nasaan na ngayon si Angel Locsin.

Nangyari ito sa recent episode ng online show n’ya kasama sina Mama Loi at Dyosa Pockoh.

Marami kasing fans ang naghahanap sa aktres sa previous post nila kaya naman minabuting sagutin ito ni Ogie nang makakalap na s’ya ng impormasyon tungkol sa aktres.

Kung titingnan kasi, ang huling post si Angel sa Instagram ay noon pang August 2022 noong dumalo ito sa baby shower party ni Angelica Panganiban.

August last year din nang huling mag-post sila ng mister n’yang si Neil Arce ng vlog entry nila sa kanilang The Angel & Neil Channel sa YouTube.

Nitong nakalipas na August naman ang huling Instagram post ni Neil pero kapansin-pansing hindi rin n’ya kasama si Angel sa mga recent posts n’ya.

Dahil dito, may mga fans umano na nagtatanong kung nasaan na si Angel ngayon, kung buntis na raw ba s’ya kaya naka-hiatus s’ya sa social media, o hiwalay na ba sila ni Neil?

May mga nag-i-speculate din na baka umano way ito ng aktres para surpresahin ang kanyang fans na sexy na s’yang muli.

Ayon kay Ogie Diaz, who has a direct line to Angel, intentional umano ang pagiging absent ni Angel sa social media.

“Si Angel Locsin po ay nasa bahay, oo. At ine-enjoy ni Angel Locsin ang kanyang absence sa social media. Ayaw n’ya munang mag-social media,” lahad ng comedian-vlogger.

Hindi rin daw totoo ang tsikang hiwalay na sila ng mister nito at hindi rin umano ito buntis.

“Sila pa rin ni Neil Arce. Hindi naman komo hindi nagpo-post si Neil, e, hindi na sila. Sila pa rin po,” saad pa ni Ogie.

“Ine-enjoy n’ya lang ang kanyang pagiging maybahay kay Neil Arce. S’yempre, gumagalaw pa rin ng cellphone si Angel. Naaaliw s’ya sa mga [mobile] games,” dagdag n’ya.

Hiling pa ng showbiz insider, wag nang urutin pa ang aktres at hayaan na lang ito kung doon ito masaya.

“Ibigay natin kay Angel Locsin ’yon. ’Yon ang gusto n’ya, e,” aniya.

Kinumusta naman ni Loi kay Ogie ang sinasabing pagpapakondisyon ni Angel ng katawan.

“Sabi ng aking source ay ganu’n pa rin naman. Basta happy si Angel Locsin na s’ya ay maybahay o taong bahay,” sagot ni Ogie.

Masaya raw itong nakapirmi sa bahay sa ngayon matapos ang ilang taong pagbabanat nito ng buto during her younger years.

“Ine-enjoy ni Angel ’yon kasi kung maalala mo, Loi, nu’ng kanyang kabataan talagang bugbog sa trabaho si Angel,” paliwanag ni Ogie.

“Samahan pa ’yan ng pag-aalaga n’ya ng kanyang tatay. ’Yong tatay n’ya ang alam ko nasa kanya din. Hands-on s’ya sa pag-aalaga sa tatay n’ya,” dagdag pa n’ya.

Sey naman ni Mama Loi, abangan na lang daw dahil baka naman imbitado ang Kapamilya actress sa upcoming ABS-CBN Ball. Baka doon ay muli nang masilayan ng mga fans ang kanilang idolo.

“Naku, ’Nay. Abangan natin ’yan. For sure, imbitado s’ya sa ABS-CBN Ball. A-attend kaya s’ya?” tanong ni Mama Loi.

“’Yan ang itatanong natin. Baka din hindi, hindi s’ya um-attend,” sagot ni Ogie.

Ilang malalaking social gathering na rin kasi sa showbiz nitong mga nagdaang taon ang pinalagpas ni Angel.

Ganu’n pa man, suportado raw n’ya kung ano man ang gustong gawin ng aktres.

“S’yempre, wini-wish natin kay Angel Locsin na i-enjoy n’ya lang ang kanyang pag-a-absent sa social media,” aniya.

“D’yos ko! Alam mo, ang daming hindi nakakagawa nu’n, ’yong walang cellphone sa tabi. Parang ikamamatay nila,” he added.

Sinegundahan naman ito ni Mama Loi.

“Deserve mo ’yan, Ms. Angel, kung ’yan ang choice mo. Full support kami d’yan,” pahayag nito.

“Ganu’n lang ang buhay. Kung saan ka masaya basta hindi ka nagugutom, may sapat kang ipon, ’yong financial stability… Lalo na ’yong emosyon sa panahon ngayon, ’yong mga mental health issues,” punto pa ni Ogie.

“Importante din na alagaan ni Angel ang kanyang sarili at hanapin n’ya kung ano ang kapayapaan ng kanyang kalooban,” pagtatapos n’ya.