Unti-unti nang lumilitaw ang mga kalunos-lunos na detalye tungkol sa misteryosong pagkamatay ng Oscar-winning American actor na si Gene Hackman, 95, at ng kanyang asawang si Betsy Arakawa, 63.

Natagpuan ang mga walang buhay na katawan nina Hackman, Arakawa, at ng kanilang aso sa tahanan nila sa Santa Fe, New Mexico, USA, noong Miyerkules, Pebrero 26, 2025.

“Partially mummified” na ang bangkay nina Hackman at Arakawa, isang indikasyong matagal na silang binawian ng buhay bago pa man natuklasan ang kanilang mga labi.

Natagpuan sa magkahiwalay na lugar ng tahanan nila ang bangkay ng mag-asawa na 34 taon nang kasal.

THE STATE OF HACKMAN AND ARAKAWA’S BODIES WHEN THEY WERE FOUND

Sa ulat ng mga imbestigador, natagpuan ang bangkay ni Hackman sa labas ng kusina ng kanilang bahay.

Nasa tabi ni Hackman ang kanyang salamin at baston kaya hinihinalang namatay siya dahil sa biglaang pagkatumba.

Si Arakawa ay natagpuan namang nakahiga sa kanyang side sa may banyo, at may portable heater malapit sa tabi niya

May nakita rin silang prescription bottle at mga nakakalat na tabletas sa bathroom countertop na malapit sa katawan ni Arakawa.

Bloated na ang mukha at mummified na ang mga paa at kamay ni Arakawa.

Ang alaga nilang German shepherd ay natagpuan ding patay hind kalayuan sa katawan ni Arakawa.

Ngunit buhay naman nang matagpuan ang dalawa pang alagang aso nina Hackman at Arakawa — ang isa ay malapit sa kinaroroonan ng katawan ni Arakawa at ang isa pa ay nasa labas ng bahay.

Ayon sa search warrant, posibleng may access sa doggy door o maliit na butas sa pintuan na maaaring daanan ng mga aso kaya nakaligtas ang mga ito.

POSSIBLE CAUSE OF THE COUPLE’S DEATH

Hinala ng anak na babae ni Hackman, maaaring namatay ang kanyang ama at si Arakawa dahil sa carbon monoxide leak kaya tumutulong sa imbestigasyon ang New Mexico Gas Company.

Sinabi naman ng isang Santa Fe detective na kahina-hinala ang pagpanaw nina Hackman at Arakawa dahil nakita nilang bahagyang bukas ang pintuan ng harap ng bahay ng mag-asawa kaya nangangailangan ito ng masusing imbestigasyon.

Ayon kay Santa Fe County Sheriff Adan Mendoza, “there could be a multitude of reasons why the door was open.”

Napag-alaman din ng mga imbestigador na walang pahiwatig na nagkaroon ng gas leak sa tahanan ng mga pumanaw, at ito rin ang resulta ng pagsisiyasat ng mga tauhan ng fire department ng New Mexico.

Wala namang nakita ang mga empleyado ng New Mexico Gas Company na mga palatandaang may problema sa mga tubo sa loob at paligid ng tirahan nina Hackman at Arakawa na magdudulot ng carbon monoxide leak.

Wala ring indikasyon ng krimen o foul play bagamat hindi nila ito tuluyang inaalis sa kanilang imbestigasyon.