Maraming tanong si Marco Sison kaugnay sa pagpanaw ng 17-anyos niyang apo na si Andrei Sison noong Marso 24, 2023.

“Ayoko namang tanungin yung mga… yung design,” pagmuwestra ni Marco sa Nasa Itaas sa mediacon ng The Class of OPM nitong Abril 10, 2023, Lunes ng hapon , sa Gerry’s Grill, Morato Ext., Quezon City.

“Kaya lang siyempre, yun yung laging sinasabi — everything happens for a reason. Ano yun?

“So, sabi ko, ‘That I have to find out.’ Hihintayin ko yun in the coming days, months or years kung ano yun,” pagkibit-balikat ng veteran singer.

“Kung anong reason, di ba? Kasi ang dating sa akin, parang… parang sakripisyo.

“For something what? Bigger, better, brighter? He’s so full of life, di ba? So promising, so talented… and then, wala lang. Hanggang doon lang.

“Hindi man lang niya naranasan yung… sarap ng buhay ng isang tao.”

THE PECULIAR INCIDENT WHEN ANDREI WAS 18 MONTHS OLD

Bakas ang pait sa pagngiti-ngiti ni Marco. Patigil-tigil siya sa pagsasalita.

Pagpapatuloy ng veteran singer, “Pero nakakapagtaka, may nangyari diyan, e, when he was about 18 months.

“Nahulog yan sa third floor ng condo na tinutuluyan nila. Walang nangyari sa kanya, e.

“Walang nangyari. Parang meron lang siyang scratch. Actually, nagpa-panic yung tatay niya, si Alain, kung anong nangyari.

“Sabi ko, ‘Dalhin mo agad sa hospital.’ Pero I guess, wala talagang nangyaring malala.”

May guardian angel kaya noon si Andrei?

“Siguro. Kasi 18 months, di ba? Practically baby pa yun. And then… eto, sakay ka ng kotse, naka-seatbelt ka, di ba?

“Lahat ng proteksiyon, airbag, everything… o, wala na. Parang ganun.”

THE TRAGIC NEWS about andrei’s death

Ang tatay ni Andrei na si Alain ang tumawag kay Marco at nagbalita ng trahedya.

“Siyempre, kapag ganun, parang nakakabingi yun, e,” napapangiti muling sambit ni Marco.

“Hindi mo alam kung totoo, tapos tatay… tatay ka, magbibiro ka ng ganun?”

Hindi siya naniwala agad?

“Naniwala ako. Kaya lang… bakit ganun?” pagkunot-noo ni Marco.

“Hindi ko tinanong kung totoo. Basta, bakit kaya? Kasi, yun nga kaagad. Yung question mark.

“Eto na yun, di ba? Everything happens for a reason, sige! Aabangan ko yun kung ano yung rason na yun.

“Ngayon, hindi natin alam kung ano yun.”

HOW IS THE SISON FAMILY AFTER ANDREI’S DEATH

Nagparamdam ba sa kanya si Andrei?

“Sa akin, wala. Mas worried ako dun sa anak ko, actually,” pagtatapat ni Marco.

Kumusta na ang anak niyang si Alain?

“Nitong Holy Week, tinawagan ko siya. Kinumusta ko. Medyo OK na siyang magsalita. Clear yung voice niya,” pahayag ng simpatikong mang-aawit.

“Unlike before during the wake, talagang lutang na lutang. Parang hindi ka kilala

“Kasi, it’s not a normal thing, di ba? Siyempre, the parent usually moves on first, di ba? Not a kid, di ba?

“As a father, I was worried more siyempre kay Alain. Yun lang, nanghihinayang lang ako. Kasi… sayang.”

ANDREI AS A DOTING GRANDSON

Laging kabiruan ni Marco sa Messenger ang namayapang apo.

“Nung lumalaki na siya, humihingi siya ng cell phone. Mahal pag humingi siya ng cell phone!” bulalas ni Marco.

“Tapos ahh… ano, lagi niyang sinasabi yung… mas pogi raw siya sa akin.”

Napailing si Marco, “Sabi ko, ‘Wala kang karapatang magsalita ng ganyan, kasi ako ang original! Lahat kayo galing sa akin!’”

Spoiler ba siya na lolo?

“Hindi naman. Kasi, pag pumupunta sila sa bahay, siyempre OK ang relationship namin.

“Pero the usual lang. Walang… walang ano. Mas may lokohan pa nga. Yung natatandaan ko sa kanya, mabagal tumangkad yun, e.

“Pero lately, bigla siyang tumaas. E, if you notice, si Andrei, ang laki ng tenga. Sabi ko nga, ‘Mas mabilis lumaki ang tenga mo kesa sa height mo.’

“Iyon ang biruan namin lagi.”

Matagal-tagal na nang huling nagkaharap at nag-usap silang maglolo.

“Meron akong sasakyan na pinahiram, ang sabi ko, ‘Sige, sa inyo na yan. Kayo lang magpagawa,’ ganyan-ganyan.

“So sabi niya, ‘Puwede ko po bang gawing white yung sasakyan?’ Sabi ko, ‘Sige!’ Kasi, siya na ang gagamit.

“Eventually di ba, kung natuloy. Yun lang, last. Tapos… siyempre, busy na siya, e. Lagi na siyang nagwo-workshop.

“Kinukumusta ko na lang siya through his father. Na OK, tumataas na, marunong nang kumanta…”

Nakapag-duet ba sila ni Andrei? Nakapag-jamming?

“Hindi. Never. Kasi pagka nandoon ako sa kanila, may occasion, umaakyat na yun sa itaas,” salaysay ni Marco.

“Doon lang siya. Sobrang bait nun. Walang bisyo. Nung pandemic days, kahit bumili ng kendi sa tindahan, hindi siya nakakalabas.

“So pag sinabi ng tatay niya, ‘Huwag na,’ hindi siya umaalis. Ganun lang.

“E, sabi, pagka ganun daw, masyadong mabait, kinukuha ni Lord.

“Pero hindi, para sa akin, dapat mas malalim dapat ang rason kung bakit ganun.”

IS MARCO SISON MABAIT?

Maituturing ba niya ang kanyang sarili na mabait?

“Ako? I think so, yeah. Yeah. Hindi naman sa pagbubuhat ng bangko pero I think so.

“E bakit ganun, di ba? So, may purpose ba? Siya, natapos na siguro ang purpose niya.

“Sa akin naman, ano yung reason? Yun ang sa akin. Bakit siya kinuha nang ganun? There has to be a really good reason, di ba?

“Pero I am not questioning Him, di ba?” pag-iling ni Marco habang itinuro muli ang Nasa Itaas.

If ever, may gusto ba siyang sabihin kay Andrei na hindi niya nasabi noong buhay pa ito?

Napakibit-balikat si Marco, “Wala naman siguro. Kasi kami naman, all-out support kami with each other, e.

“Minsan-minsan lang kami magkita pero… masaya kami! Kasi ano kami, yung… halos pare-pareho lang ng buhay. Yun bang colorful din pero in-accept namin ang isa’t isa. Isa’t isa. Sila, meron din silang mga… makukulay na simula, e.

“On my side, ganun din. So, ano yun, parang nagkakaintindihan kami lahat. Tapos walang inggitan. Bawal sa amin yun, bawal…”

Kasama ni Marco sa concert na The Class of OPM sina Dulce, Rey Valera, at ang natirang Apo Hiking Society members na sina Jim Paredes at Boboy Garrovillo.

Gaganapin ang concert sa Mayo 3 sa The Theater at Solaire.

Guests dito sina Andrea Gutierrez, Elisha at VR Caballero. Fund-raising event ito ng Soroptimist International of the Americas Philippines Region.

Ang halaga ng tiket ay P3000 (SVIP), P2000 (Patron), at P1000 (Balcony). Available ang tiket sa Solaire Box Office at Ticket World. Para sa ticket reservation, tumawag sa 0932-404-9551.