Ibinahagi ni Vice Ganda na minsan nang nag-resign ang boyfriend niyang si Ion Perez sa It’s Showtime, kung saan nagsisilbing usher ang binata.

Lahad ni Vice, “Eto, para sa kaalaman ng lahat, si Ion po ay minsan nang nag-resign dito sa Showtime dahil sa sobrang bashing na inaabot niya.

“Hindi niya kaya. Umiiyak siya lagi sa nanay niya.

“Sabi niya, magtitinda na lang daw siya ulit ng kakanin sa Tarlac.

“Kaya na niya naman daw. Magbabantay na lang daw siya sa palengke.”

Napigilan lamang daw si Ion sa kanyang pag-alis sa pakiusap ng direktor ng show na si Bobet Vidanes.

Sabi ni Vice, “Kinausap lang siya ni Direk Bobet at ngayon nandito siya.

“Pinagalitan siya ni Direk Bobet para hindi siya huminto sa ginagawa niya.”

BREAKTHROUGH AWARD

Naungkat ang tungkol sa muntikan nang pag-alis ni Ion sa It’s Showtime dahil sa Breakthrough Artist award sa ginawang online poll ng isang online entertainment site.

“‘Nay, eto, o, ‘yung kasama mong nagtitinda ng kakanin, may award na…” saad ni Ion.

Pagkatapos ng kanyang pahayag ay naging emosyonal si Ion.

“Hindi ko po lubos-maisip na mabibigyan ako ng ganito,” sabi niya sa episode ng It’s Showtime ngayong Biyernes, November 15.

Sa pagiging emusyonal ni Ion ay nadala si Vice.

Kuwento ni Vice, hindi pumunta si Ion sa mismong awards night nahihiya raw ito.

“Lagi siyang nahihiya. Walang kabilib-bilib sa sarili niya,” sabi ni Vice tungkol sa boyfriend.

Pinaalalahanan ni Vice si Ion na huwag kalimutan na sa simpleng ginagawa nito sa showbiz ay marami itong napapasaya.

“Simple lang ang ginagawa mo, Ion, pero ang dami mong napapanginti every day.”

Nagbigay rin ng words of encouragement sina Anne Curtis at Jhong Hilario para kay Ion, na kahit may bashers ay mas marami pa rin ang taong napapasaya nito.

“Hindi mo ba naririnig tuwing pumapasok na rito, grabe yun hiyawan ng madlang people sa ‘yo?” paalala ni Anne.

Nagpasalamat si Ion sa mga sumusuporta sa kanya.

Sabi naman ni Vice sa kanya, “Congratulations. I’m very proud of you and I love you.”