kathryn bernardo alden richards bench body of work
Kathryn Bernardo and Alden Richards were spotted greeting each other at the backstage of MOA Arena during the Body of Work: The Bench Show on March 21, 2025.



PHOTO/S: Screen grab from TikTok

Hindi totoo ang usap-usapang hindi nagpansinan sina Kathryn Bernardo at Alden Richards sa Body of Work: The Bench Show na ginanap sa MOA Arena noong Biyernes, Marso 21, 2025.

Ang mga kuhang video sa backstage ng Mall of Asia Arena at lumabas sa social media ang katibayang nagpansinan sina Kathryn at Alden.

Malinaw na makikita sa video na binati nina Alden at Kathryn ang isa’t isa, at humawak pa ang aktor sa beywang ng kapareha niya sa blockbuster movie na Hello, Love, Again.

Isa itong sapat na pruweba na hindi totoo ang mga hinalang hindi sila magkasundo.

 

FAKE NEWS ABOUT KATHRYN-ALDEN SNUBBING INCIDENT

Nag-ugat ang fake news na hindi nagpansinan sina Alden at Kathryn sa curtain call ng Body of Work dahil nakunan sila ng mga video na hindi nag-uusap sa entablado, habang kasama ang ibang mga personalidad na may partisipasyon sa naganap na fashion show.

bench body of work
Alden Richards (left side, in white sando) and Kathryn Bernardo (right side, in two-piece) during the curtain call of Body of Work: The Bench Show at MOA Arena on March 21, 2025. 

Photo/s: Bench Lifestyle Facebook

Dahil dito, may mga nagmalisyang may problema sa pagitan ng dalawa.

Mula nang mag-umpisa ang showbiz career ni Alden noong 2011, hindi ito nasangkot sa mga away.

Kilala rin ang Kapuso actor sa pagiging gentleman kaya hindi kapani-paniwala ang lumutang na balitang hindi niya pinansin si Kathryn.

Ang mga miyembro ng entertainment press at ang mga artistang nakatrabaho ni Alden ang makapagpapatunay sa kanyang pagiging palabati at magiliw sa halos lahat ng mga taong nakakahalubilo niya.

Gaya ni Alden, tila wala sa ugali ni Kathryn ang hindi mamansin ng kapwa.

Pareho silang kilala sa pagiging marunong makisama.

Aral para sa lahat ang nangyari, na hindi dapat basta paniwalaan ang lahat ng mga napapanood sa mga maiiksing video.

Ang mga kaganapan lamang sa MOA stage ang kanilang nakita, hindi ang mga eksena sa backstage na nakunan din ng video — na matibay na ebidensiyang salat sa katotohanan ang kumalat na isyu tungkol kina Alden at Kathryn.