SCREENSHOT: GMANetwork on YouTube

Muntik na raw pumanaw si Superstar Nora Aunor kamakailan lang dahil sa hindi maagap na pag-attend sa kanyang medical needs.

Iyan ang isinalaysay niya kay King of Talk Boy Abunda nang mag-guest siya sa programa nitong Fast Talk With Boy Abunda sa GMA-7 kahapon, February 20.

Natanong kasi ni Tito Boy si Ate Guy tungkol sa ilan sa mga nangyaring himala sa buhay ng beteranang aktres.

Ito nga ang naikuwento niya, noong isinugod siya sa ospital dahil sa pagbaba ng oxygen level sa kanyang katawan.

“Hindi ko alam kung p’wede ko sabihin. Kasi…namatay na ako ng three minutes, e, itong mga nakaraan lang. Ewan ko, ngayon ko lang sasabihin ito,” panimulang lahad niya sa kanyang rebelasyon.

Nangyari nga raw ito nang minsang isinugod siya sa ospital.

“Pero kasi, ang nangyari noon… ’Di ba, noong nagkakasakit ako, ilalabas ako ng gabi, madaling araw dadalhin na naman ako sa ospital,” pagbabalik-tanaw ni Nora.

“May insidente na sabi ko, ‘Halika na!’ Kasi bumababa na ang oxygen [level], e, sa katawan. So, takbo na naman sa ospital.”

Ayon pa sa kanya, hindi daw siya kaagad naasikaso sa ospital kaya’t nawalan na lang daw siya ng malay.

“[Pagdating] sa ospital, sabi ko, ‘Oxygen lang po ang kailangan ko.’ Ang nangyari… Hindi ko alam. Walang tumulong [kaagad]. Hindi minadali na lagyan ako ng oxygen,” kuwento ni Ate Guy.

“Ang nangyari, humiga ako. Pagka higa ko, hindi ko na alam kung anong nangyari. Pagising ko nandu’n na ako sa ICU [intensive care unit].”

Doon na raw ipinagtapat sa kanya ng mga kasama niya na namatay na umano siya for three minutes pero luckily ay naagapan daw ito.

“‘Ang sabi nga sa akin, ang suwerte mo mahal ka ng Diyos. Sabi niya, kasi binalik ka uli. Siguro ’yong misyon mo hindi pa tapos. Meron ka pang dapat na gawin sa mundo.’ ’Yon ang laging sinasabi sa akin ng ibang kaibigan ko,” saad pa niya.

Humingi naman siya ng paumanhin sa kanyang mga fans dahil inilihim niya sa kanila ang bagay na ito.

“Ito hindi talaga alam ng mga tao. Sorry po, napag-usapan. Hindi naman siguro masama na sabihin ko sa inyo ang totoo na ’yon ang talagang nangyari sa akin,” sey pa n’ya.

Samantala, napag-usapan din nila ni Tito Boy ang naging issue nila ng anak niyang si Matet de Leon bago matapos ang 2022 dahil sa gourmet tuyo and tinapa business.

Dito inamin ni Nora na hindi lang daw sila magkaunawaan ng kanyang anak. Hindi rin daw niya alam that time na may pinagdadaanan si Matet.

“‘Yon naman kasi, hindi kami… Siguro may pinagdadaanan ang anak ko. Hindi ko rin naman alam na may pinadadaanan s’ya,” paliwanag ng aktres.

Natuwa lang daw siya noon na mag-start ng food business pero hindi niya daw inasahan na sasama ang loob ni Matet sa kanya.

“Ang sa akin, nagkaroon ako ng, ‘Halika, gawa tayo tuyo.’ Ganyan, ganyan. Hindi ko alam ikakasama ng loob n’ya. ’Yon, nagkaroon ng sama ng loob,” aniya.

Ang mahalaga naman daw ay nagkausap at nagkaayos na silang mag-ina, ganu’n din ang relasyon niya sa iba pa niyang mga anak.

“Okey kami ngayon. Dinadalaw ako ng nga anak ko. Sina Ian… kararating lang pala nina Ian galing ng Japan. Pagka Sunday, pinapasyalan nila ako. Lahat sila, pamilya. Si Lotlot, lately, nagkikita kami at pinupuntahan n’ya din ako,” pagbabahagi niya.

Pag-amin pa ni Nora, hindi siya perpektong ina. Ang importante naman daw kasi ay nagkakausap sila ng kanyang mga anak.

“Sabi nga nila, ‘Nanay ka. Ipakita mo sa mga anak mo kung ano ang tama,‘” aniya.

“May mga pagkukulang… Marami akong pagkukulang sa mga anak ko. Pero pag nagkikita naman kami, nasasabi ko ’yong mga sama ng loob ko sa kanila.

“Pinag-uusapan namin kung ano ang dapat gawin. Nakikinig naman sila. Ang importante doon nagkakausap kami,” pagtatapos ni Ate Guy.