• Inamin ni Rufa Mae Quinto na may pinagdadaanan ang relasyon nila ng kaniyang asawang si Trevor Magallanes
• Umaasa siyang maayos pa ang kanilang problema upang mabuo ang kanilang pamilya
• Ibinahagi niyang madalas siyang wala sa piling ng asawa dahil sa kaniyang trabaho kaya nauunawaan niya ang nararamdaman nito
• Sinabi ni Rufa na mahal pa niya si Trevor ngunit handa siyang igalang ang desisyon nito kung nais na nitong maghiwalay

Sa isang emosyonal na panayam sa “Fast Talk with Boy Abunda” nitong Biyernes, inamin ng actress-comedienne na si Rufa Mae Quinto na may pinagdadaanan ang relasyon nila ng kaniyang asawang si Trevor Magallanes. Gayunpaman, umaasa si Rufa na maayos pa ang kanilang problema at mabuo ang kanilang pamilya.

Ibinahagi ni Rufa na madalas siyang wala sa piling ni Trevor dahil sa dami ng kaniyang trabaho, dahilan upang lumayo ang kanilang loob sa isa’t isa.

Sa kabila ng kanilang sitwasyon, pinasalamatan ni Rufa si Trevor sa pagiging mabuting asawa at ama, ngunit inamin niyang naaapektuhan na rin ang kanilang anak na si Athena. Ayon kay Rufa, iniwasan niyang maghain ng diborsyo dahil masyado pa raw masakit ang sitwasyon at iniisip niya ang kanilang anak.

Aniya, “Mahal ko siya, siyempre. At gusto ko siyempre makumpleto ang pamilya namin. Pero kung desidido na siyang maghiwalay, rerespetuhin ko ‘yun kahit masakit.” Bagama’t may mga haka-haka tungkol sa estado ng kanilang pagsasama, wala pa umanong pormal na dokumentong isinampa para sa diborsyo mula sa magkabilang panig.

Nagpakasal sina Rufa at Trevor noong 2016 at biniyayaan ng isang anak, si Athena, noong 2017. Sa kasalukuyan, nananatiling bukas si Rufa na ayusin ang kanilang relasyon, ngunit igagalang niya ang anumang magiging desisyon ng kaniyang asawa.

Si Rufa Mae Quinto-Magallanes ay sumikat bilang isang Filipina actress, comedian at TV host. Nakilala siya sa kanyang kakaibang estilo ng pagpapatawa. Pinasok niya ang mundo ng showbiz nang mapabilang siya sa That’s Entertainment noong 1996. Ilan sa sumikat niyang pagganap ay bilang si ‘Booba’ sa pelikulang Booba noong 2001 at bilang si ‘Boobita Rose’ sa Masikip sa Dibdib.

Matapos ang kanyang pamamalagi sa Amerika, bumalik kamakailan sa Pilipinas si Rufa Mae. Nauna siyang napasama sa UniTeam rally na talaga namang pinag-usapan. Sa kanyang pag-uwi sa Pilipinas, ibinahagi niya sa kanyang social media account ang bagong bahay na kanilang tinitirhan pagbalik nila sa Pinas.

Matapos lumabas ang video ng kanyang pagkanta sa rally para kay Senator Manny Pacquiao, agad na nag-trend sa Twitter si Rufa Mae. Marami ang nawindang na makita siya sa naturang rally dahil bago ito ay naroroon din siya sa UniTeam rally ni Pangulong Bongbong Marcos. Maging si Rufa Mae ay binahagi sa kanyang Instagram story ang screenshot ng top trends sa Twitter kung saan makikita ang kanyang pangalan.

Source: KAMI.com.gh